L TIEMPO

Ua de las cousas que mais ten feito pensar la giente ye cumo se adbina l tiempo que bai a fazer. L tiempo siempre fui mui amportante para la nuossa region. Para las lidas de l campo.

Saber quando chube, quando faç sol, quando gela, quando neba…

Habie siempre un antendido que sabie mais ou menos.

Habie las  «cabanholas» que éran ua forma de ls mirandeses miráren l tiempo que fazie zde l die 13 de Dezembre até l die 24 i apuis de l die 26 al die 6 de Janeiro. L die 13 ye Janeiro i assi até l die 24 que ye Dezembre i apuis al para trás, 26 ye Dezembre i 27 Nobembre, até l die 6 que ye Janeiro, l die 25 nun cuonta. Cunsante stubisse l die assi serie l més de l anho. Mas ten que se mirar ls dies para lantre i para trás i cuntar culs dous.

Habie l reportório, mas hoije yá hai cousas mais siguras.

L reportório ( inda se bende )

Hoije ls sateletes yá móstran todo l mobimento de la tierra i de las nuobes i sabe-se l tiempo que bai a fazer.

Andaba a bendimar para ls lhados de Atanor i bi l castielho de Algoso, alhá lonje i lhembrou-me de que alhi ye un punto de onde ls sateletes móstran l tiempo que faç.

L Castilho de Algoso

Cumo cuido que muitos nun sáben desso antendo que ye ua buona nuoba para bós.

Se quereis saber l tiempo que bai a fazer an qualquiera tierra de l mundo, drento de dieç dies,  ye solo ir a la anternete  al site  http://br.weather.com/weather/local/POXX0041 i yá ancuntrais todo.